Convenio Colectivo de Empresa de CONCELLO DE VERIN. PERSOAL FUNCIONARIO de Ourense

Logo de se reunilas partes negociadoras, representadas por D. Jorge Prieto Prieto, D. Luís Alfonso Morán Castro e D. Luís José Díaz Prieto, como delegados de persoal da Confederación Intersindical Galega ( CIG) en representación dos funcionarios municipais, D. Emilio González Afonso, como alcalde da Corporación, D. Alberte Blanco Casal e D. Santiago Cid Harguindey, como representantes do grupo de goberno e D. Anxo García Torres e D. Luis Ferreiro Fernández, en representacion da CIG acordan as presentes disposicións reguladoras das condicións de traballo para o persoal funcionario do Ilmo. Concello de Verín, cuxas disposicións son as que a seguir se detallan.

Título primeiro: Normas xerais

Capítulo primeiro: Ámbito de aplicación

Artigo 1: Ámbito de aplicación persoal

1. - As normas contidas no presente acordo aplicaranse a todo o persoal que reúna a condición de funcionario, mentres perdure a dita condición, de acordo coa normativa vixente, e que preste servizos retribuídos para o Concello de Verín.

2. - Non serán de aplicación as súas disposicións ó persoal funcionario que puidese prestar servizos retribuídos por outra administración pública neste Concello ou que, por calquera motivo, fosen obxecto de cesión para a prestación de servizos neste Concello de conformidade coa normativa vixente.

Artigo 2: Ámbito de aplicación temporal

1. - O presente acordo regulador das condicións de traballo do persoal funcionario considerarase vixente dende o día 1 de xaneiro de 2004 ata o día 31 de decembro de 2007, como regra xeral, e salvo as particularidades que se inclúen nos seguintes parágrafos.

2. - A eficacia e aplicación das disposicións deste acordo, con carácter xeral terán efectos retroactivos, entendéndose aplicables partir da data do 1 de xaneiro de 2004. Unha vez se aprobe a relación de postos de traballo e o orzamento municipal con carácter firme e definitivo, a partir da súa entrada en vigor, acordarase unha paga compensatoria única para dar efectividade ás retribucións salariais xa revisadas e producidas dende a data do 1 de xaneiro de 2004, polo desempeño das funcións especificadas na relación de postos de traballo correspondente dende a dita data.

3. - O presente acordo quedará prorrogado, de forma automática, por sucesivos períodos de un ano, en caso de non ser denunciado por ningunha das partes.

4. - No caso de que denunciaran o presente acordo algunha das partes, pero a negociación non se iniciase ata data tardía ou se prolongara demasiado no tempo, mentres non entre en vigor o novo acordo entenderanse aplicables s disposicións contidas no último acordo vixente.

Artigo 3: Ámbito de aplicación material. Quedan reservadas á negociación colectiva todas aquelas cuestións que, directa ou indirectamente, afecten ás condicións de traballo do persoal funcionario deste Concello, de conformidade co artigo 32 da Lei 9/1987, do 12 de xuño, sobre órganos de representación, determinación das condicións de traballo e participación do persoal ó servizo das administracións públicas e, en particular:

a) O incremento das retribucións de funcionarios e do persoal estatutario deste Concello que proceda incluír no proxecto correspondente para o orzamento municipal.

b) A determinación e aplicación das retribucións dos funcionarios públicos.

c) A preparación e deseño dos proxectos de emprego público

d) A clasificación de postos de traballo, a través dos cadros de persoal e as relacións de postos de traballo.

e) As propostas sobre dereitos sindicais e dereitos de participación.

f) Medidas sobre seguridade e saúde laboral.

Capítulo segundo: Principios xerais

Artigo 4: Principios de totalidade e indivisibilidade. As condicións pactadas neste acordo forman un todo orgánico e indivisible e, para os efectos da súa aplicación práctica, serán consideradas global e conxuntamente.

Artigo 5: Principio de legalidade e xerarquía normativa

1. - As disposicións contidas no presente acordo quedarán, en todo caso, subordinadas calquera disposición xeral de rango superior.

2. - No suposto de que calquera cambio normativo puidese supor a non aplicación dunha disposición contida no presente acordo, convocarase comisión negociadora para a adaptación do acordo á normativa vixente da forma que se considere máis conveniente ós intereses das partes.

Artigo 6: Outros principios interpretativos

1. - As partes, a través do presente acordo, deberán perseguila mellora das condicións de traballo dos funcionarios públicos deste Concello, facendo este fin compatible cunha maior eficacia no funcionamento da administración municipal e cunha mellor calidade dos servizos públicos que se prestan ós cidadáns.

2. - O texto e as disposicións deste acordo someteranse á interpretación, necesariamente, de acordo cos principios de boa fe, mutua lealdade, cooperación e igualdade e non discriminación entre os funcionarios que son destinatarios das súas normas.

Título segundo: Solución de conflitos

Capítulo primeiro: Comisión de Control

Artigo 7: Comisión de Control. Despois da súa aprobación, nun prazo máximo de sesenta días naturais, constituirase unha Comisión de Control, para o seguimento da aplicación efectiva deste acordo, entre o goberno municipal e os representantes sindicais dos funcionarios.

Artigo 8: Composición

1. - A Comisión de Control estará integrada por

1 º )En representación do Concello, o goberno municipal, en exercicio das súas competencias, que estará integrado polo alcalde, en canto presidente da Corporación, e os concelleiros delegados de Persoal e de Facenda, de existir delegacións nestas materias, ou persoas que os substitúan.

2 º )En representación do persoal funcionario, os tres representantes legais dos funcionarios ou persoa en quen deleguen

2. - Poderán asistir, con voz, pero sen voto:

1 º )O/A secretario/a da Corporación.

2 º )O/A interventor/a da Corporación.

3 º )Os sesores sindicais que se determinen

3. - Poderá recabarse a asistencia de técnicos municipais ou outros membros do persoal funcionario con funcións de asesoramento ou información á comisión cando así se considere necesario.

Artigo 9: Funcións

1. - As funcións da Comisión de Control consistirán en emitir informes sobre as seguintes materias:

a) Interpretación do texto do acordo, co fin de resolver as dúbidas que xurdan ou as consultas que as partes formulen para unir criterios.

b) Actualización deste acordo para a súa adaptación ás novas normas de rango superior que se puidesen aprobar.

c) Mediación en conflitos colectivos entre as partes, cando o pida calquera delas.

d) Arbitraxe dos conflitos colectivos, cando as partes sí o soliciten por escrito, sendo así o seu resultado vinculante para ambas partes.

e) Cantas outras actividades tendan ou afecten á eficacia práctica dos acordos aquí pactados.

2. - Calquera acordo da Comisión de Control relativo á interpretación das normas contidas neste acordo engadirase como anexo, sendo a aplicación dos seus criterios interpretativos de obrigada aplicación.

Artigo 10: Conflitos

1. - Calquera conflito colectivo que se suscite no ámbito do presente acordo requirirá, para a súa consideración de licitude, o coñecemento previo da Comisión de Control.

2. - Igualmente, poderase acudir para a solución de conflitos todas aquelas vías legais que sexan de aplicación

Artigo 11: Réxime de funcionamento

1. - Esta comisión terá carácter paritario e as súas reunións poderán ser ordinarias ou extraordinarias.

2. - Son reunións ordinarias aquelas que se realicen unha vez ó trimestre.

As datas, horas, lugares da reunión, convocatoria e a súa antelación mínima, se é o caso, determinaranse de común acordo na primeira reunión que se realice.

3. - Son reunións extraordinarias aquelas que se realicen por pedimento expreso de calquera das partes, mediante escrito que deberá ir asinado, polo menos, por dous dos seus membros e que irá acompañado da correspondente motivación sobre os asuntos que se tratarán.

As ditas reunións efectuaranse dentro das setenta e dúas horas seguintes á data do rexistro de entrada do documento en que se solicite.

Capítulo segundo: Outros medios de solución de conflitos

Artigo 12: Xurisdición

1. - As funcións desta comisión non impedirán, en ningún caso, o libre exercicio da xurisdición contenciosoadministrativa, prevista na lexislación vixente, nos casos en que así proceda.

2. - A Comisión de Control deberá pronunciarse sobre os suntos que se lle sometan de xeito que, se é o caso, poidan exercitarse en prazo os recursos legais correspondentes

Artigo 13: Presentación de conflitos. As partes sinantes deste acordo quedan, así mesmo, obrigadas presentalas discrepancias que se puidesen producir a través de calquera dos procedementos de solución de conflitos que se establecen no presente título.

Título terceiro: Organización do traballo

Capítulo primeiro: Competencias de organización

Artigo 14: Competencia

1. - A organización práctica do traballo será competencia do alcalde ou do concelleiro delegado de persoal, se as ditas competencias estivesen delegadas.

2. - Emporiso, cando se trate de cuestións das que se deriven especiais repercusións ou consecuencias de especial gravidade nas condicións de traballo do funcionariado municipal, deberase negociar cos representantes sindicais dos funcionarios, a través da Comisión negociadora.

Capítulo segundo: Traballos de diferente categoría

Artigo 15: Traballos de superior categoría

1. - A realización de traballos de superior categoría responderá a necesidades especiais, transitorias ou conxunturais e prolongaranse o mínimo tempo posible para cubrilas necesidades dos servizos municipais que resulten afectados.

2. - Antes de acudir á realización de traballos de superior categoría esgotaranse os medios persoais e recursos humanos dispoñibles restantes.

3. - A adscrición dun funcionario a un posto de superior categoría efectuarase mediante decreto da Alcaldía, que será comunicado ós representantes sindicais dos funcionarios.

4. - A adscrición dun funcionario a un posto de superior categoría suporá o pagamento das retribucións complementarias propias do posto desempeñado, sempre que a dita adscrición se prolongue durante un período superior a cinco días

5. - O tempo máximo que un funcionario pode acharse desempeñando funcións propias dun posto de superior categoría, ininterrompidamente, será de doce meses, de xeito que, unha vez transcorrido o dito prazo, o posto deberá ser ocupado por outro funcionario, sempre que iso sexa posible.

Artigo 16: Traballos de inferior categoría. Ningún funcionario poderá realizar traballos de categoría inmediatamente inferior durante un período superior a quince días, transcorrido o cal non poderá ocupar posto de categoría inferior ata transcorrido un período mínimo de un ano.

Capítulo terceiro: Incapacidades

Artigo 17: Escala auxiliar

1. - A Corporación obrígase, dentro das medidas de reorganización dos postos de traballo, a través das correspondentes relacións de postos de traballo e unha vez oídos os representantes sindicais dos funcionarios, a concretar e definilos postos de traballo que poden ser considerados aptos para a creación dunha escala auxiliar.

2. - A esta escala auxiliar adscribiranse

a) De xeito obrigado, os funcionarios que teñan diminuídas s súas facultades e constatarano así os servizos médicos competentes, por incapacidade para o exercicio das súas funcións habituais.

b) De xeito voluntario, os funcionarios que sexan maiores de sesenta anos.

3. - Tódolos funcionarios que queden adscritos á escala auxiliar conservarán o total das retribucións que viñan percibindo, a excepción dos funcionarios que, voluntariamente, e tras cumprir sesenta anos, decidan quedar adscritos á dita escala, que serán retribuídos da seguinte forma:

- Salario base

- Trienios por antigüidade

- Complemento de destino consolidado

- 50% do complemento específico que viñan percibindo.

Artigo 18: Embarazo. As funcionarias que se achen embarazadas terán dereito a que se lles encomenden funcións acordes coas súas circunstancias, se o posto de traballo que exerce lle resultase prexudicial para o seu estado, de acordo coas recomendacións médicas que se acheguen.

Título cuarto: Ingreso, promoción e provisión de postos de traballo

Capítulo primeiro: Ingreso

Artigo 19: Oferta de emprego público. O Concello establecerá a oferta de emprego público dentro do mes seguinte á aprobación do orzamento municipal.

Artigo 20: Ingreso. A adquisición da condición de funcionario do Concello de Verín farase por calquera dos sistemas establecidos na lexislación vixente.

Artigo 21: Tribunais de selección. O tribunal de selección estará composto polos seguintes membros:

- O alcalde do Concello.

- Un representante de cada un dos demais grupos políticos con representación na Corporación, excluído o do alcalde.

- Dous membros da representación legal dos traballadores.

- Un técnico de igual ou superior categoría á do posto convocado.

- O secretario do Concello de Verín.

Capítulo segundo: Promoción

Artigo 22: Promoción interna

1. - O Concello de Verín reservará a máxima porcentaxe que lexislación funcionarial en vigor prevé para a promoción interna.

2. - O sistema de provisión do posto mediante promoción interna será de concursooposición, no que se cumprirán as seguintes condicións:

- Na fase de concurso, a valoración será o 45% da valoración total do procedemento.

- Na fase de oposición, non se esixirán coñecementos previamente acreditados en probas anteriores de ingreso ou noutras posibles promocións internas previas.

Capítulo terceiro: Provisión

Artigo 23: Provisión de postos. O sistema de provisión de postos de traballo será o seguinte

a) O concursooposición será o sistema normal de provisión. Os baremos de puntuación destes concursos serán aprobados polo órgano competente logo dun procedemento de elaboración no que, necesariamente, haberá participación dos representantes sindicais dos funcionarios e deberán conter, como mínimo, méritos académicos, antigüidade ou servizos prestados e méritos profesionais.

b) Libre desinación, que será o sistema co que se poderán provelos postos de traballo vinculados de forma directa á Alcaldía.

Título quinto: Vacacións, permisos, licenzas e excedencias

Capítulo primeiro: Vacacións

Artigo 24: Vacacións

1. - As vacacións anuais retribuídas do persoal funcionario serán, con carácter xeral, de un mes natural ou de vinte e dous días hábiles anuais por ano completo de servizo ou en forma proporcional ó tempo de prestación de servizos efectivos.

2. - As vacacións anuais gozaranse de forma obrigatoria dentro do ano natural e ata o día 15 de xaneiro do ano seguinte, en períodos mínimos de cinco días hábiles consecutivos, sempre que os correspondentes períodos vacacionais sexan compatibles coas necesidades do servizo.

3. - Se, por necesidades do servizo, o funcionario non puidese gozalas súas vacacións nos meses sinalados, terá dereito fixalas á súa elección.

4. - O programa de vacacións elaborarase anualmente antes do día 1 de abril, para proceder á súa negociación cos representantes sindicais dos funcionarios.

5. - A estes efectos, os sábados non serán computados como días hábiles, salvo que nos horarios especiais se estableza outra cousa.

6. - Así mesmo, e para os efectos de determinalo período computable para o cálculo das vacacións anuais, as ausencias do traballo por motivos independentes da vontade do funcionario, tales como enfermidade, accidente ou maternidade, así como aqueloutras derivadas do goce de licenzas ou permisos retribuídos, computarán como servizos efectivos.

7. - No suposto de ter completado os anos de antigüidade no Concello que se indican a continuación, terase dereito a gozalos dos seguintes días de vacacións anuais:

a) Quince anos de servizo: vinte e tres días hábiles

b) Vinte anos de servizo: vinte e catro días hábiles

c) Vinte e cinco anos de servizo: vinte e cinco días hábiles

d) Trinta ou máis anos de servizo: vinte e seis días hábiles. Este dereito farase efectivo a partir do ano natural seguinte ó cumprimento da antigüidade referenciada.

8. - No caso de baixa por maternidade, cando esta situación coincida co período vacacional, quedará interrompido o dito período e poderán gozarse as vacacións unha vez finalizado o período de permiso por maternidade.

Capítulo segundo: Permisos e licencias

Artigo 25: Permisos ou licenzas retribuídos

1. - Poderanse conceder permisos ou licenzas retribuídos polas seguintes causas xustificadas:

a) Por nacemento ou adopción de fillos, catro días

b) Por matrimonio, vinte días ininterrompidos

c) Por separación ou divorcio, cinco días

d) Por morte ou enfermidade grave dun familiar de primeiro grao de consanguinidade ou de cónxuxe:

* Se o suceso se produce na mesma localidade, catro días.

* Se o suceso se produce en distinta localidade, da mesma ou distinta provincia, cinco días.

* Se o parentesco fose de segundo grao, terase dereito a dous días menos dos sinalados anteriormente.

e) Por morte de cónxuxe, se o funcionario ten fillo menor de seis anos ou diminuídos físicos, psíquicos ou sensoriais que non exerzan ou desempeñen ningunha actividade retribuída, un mes.

f) Por traslado de domicilio, dous días

g) Por fillo menor de nove meses, unha hora de ausencia diaria do seu posto de traballo.

Este período de tempo poderá dividirse en dúas fraccións de media hora ou sustituírse por unha redución de xornada de media hora.

h) Por concorrer a exames ou a probas de avaliación en centros oficiais, o día da súa realización e, se é o caso, o día necesario para acudir ó exame ou proba, sempre baixo acreditación da dita participación co xustificante correspondente.

i) Por asistencia a congresos ou reunións de carácter profesional ou sindical, ata un máximo de oito días ó ano, sempre coa debida xustificación da súa asistencia e en función das necesidades do servizo.

l) Por asuntos propios, nove días ó ano, non sendo necesaria ningunha xustificación e salvagardando sempre as necesidades do servizo.

m) Para cumprimento dun deber público de carácter inescusable, o tempo imprescindible.

n) Para asistir a consulta médica, o tempo necesario, tralo aviso previo e con posterior xustificación. ñ) Por razón de parto ou adopción de recén nacido, cento corenta e cinco días para as funcionarias, que poderán distribuír ó seu criterio, antes ou tralo parto ou adopción.

o) Por cumprimento de obrigas derivadas da súa intervención en procedementos xudiciais que se tramiten contra o funcionario solicitante como consecuencia do exercicio das súas funcións, o tempo indispensable.

p) Por cumprimento dunha década de prestación de servizos, sete días durante dito ano.

Esta licenza non poderá acumularse ás vacacións anuais retribuídas.

q) Por cumprimento de trinta anos de prestación de servizos continuados neste Concello, quince días.

2. - No caso de que o cónxuxe dun funcionario sexa tamén funcionario deste Concello, os dereitos que se recoñecen neste artigo serán de igual goce para ambos, sen ningunha restrición, salvo as necesidades do servizo.

No caso regulado na letra ñ) do apartado anterior, o funcionario proxenitor poderá gozar de catro semanas de permiso retribuído para deducir do tempo de licenza retribuída que se recoñece na dita letra á funcionaria proxenitora.

Artigo 26: Permisos ou licenzas non retribuídos. Todo funcionario terá dereito ó goce de períodos de ata dous meses ó ano de permiso ou licenza non retribuído, conservando durante o dito período de tempo tódolos dereitos laborais que lle correspondan, incluso os dereitos de percepción do salario e de cómputo e aboamento da antigüidade.

Capítulo terceiro: Excedencias

Artigo 27: Excedencias. As excedencias regularanse de acordo coa normativa sobre situacións administrativas dos funcionarios públicos en vigor.

Título sexto: Xornada e descanso

Capítulo primeiro: Xornada e calendario laboral

Artigo 28: Duración da xornada diaria

1. - A xornada laboral será de trinta e sete horas e media semanais e desenvolverase, preferentemente, sempre que as necesidades do servizo o permitan, de luns venres.

2. - Exclúense aqueles servizos que teñan xa establecidas diferentes quendas, descansos e compensacións festivas, que se manterán.

Artigo 29: Horas nocturnas e descansos

1. - Poderase establecer un sistema específico de quendas, descansos e compensacións festivas alternativo para o servizo municipal de Policía Local, a través da aprobación dun regulamento interno da Policía Local, que será negociado, previamente á súa aprobación na Comisión xeral de negociación.

2. - Mentres non se aprobe o regulamento sinalado no artigo anterior, o sistema de horas nocturnas e descansos vixente para o servizo municipal de Policía Local rexerase polas seguintes regras:

1 º )Por cada xornada de traballo en horario nocturno que realice un funcionario terá dereito á redución dunha xornada en horario diurno e así sucesivamente. 2 º )As reducións de xornada en horario diúrno que se establezan como compensación por xornada de traballo en horario nocturno efectuaranse dentro da mesma semana na que se realice a xornada en horario nocturno.

3. - O disposto neste artigo enténdese sempre en función das necesidades do servizo, debéndoo valorar, en cada caso, o funcionario responsable de dito servizo.

4. - No prazo de un mes dende a vixencia do presente acordo, o responsable do servizo elevará un informe, no que se detallará o calendario mensual de xornadas en horario nocturno e compensacións por redución de xornada en horario diurno, á Comisión de control.

Artigo 30: Horario de traballo

1. - O horario ordinario de traballo será das 7: 45 ás 15: 15 horas, rexendo para todos aqueles meses ós que non sexa de aplicación o horario que se describre no parágrafo seguinte.

2. - O horario de verán, que abranguerá dende o 1 de xuño ó 30 de setembro, será das 8: 15 ás 14: 45 horas.

Artigo 31: Festivos. Consideraranse non laborais os días 24 e 31 de decembro de cada ano, ó igual que as festas fixadas no calendario laboral.

Artigo 32: Reducións de xornada. Recoñécese o dereito á redución de xornada dos funcionarios que se achen en calquera dos seguintes supostos, sen prexuízo do establecido para o servizo municipal de Policía Local no artigo 28 do presente acordo:

a) Redución de xornada dun tercio ou da metade, con dedución proporcional de retribucións, en caso de funcionarios que:

- Por razón de garda legal teñan ó seu cargo un menor de seis anos ou diminuído físico, psíquico ou sensorial, nas condicións establecidas polo Real decreto 2670/1998, do 11 de decembro.

- Por razón de enfermidade que precise de asistencia continuada, teñan ó seu cargo o coidado de familiares de primeiro grao de consanguinidade ou afinidade.

b) Redución de xornada de media hora diaria, sen dedución proporcional de retribucións, en caso de funcionarios que, por coidado de fillo menor de nove meses, opte por esta posibilidade, de conformidade co previsto no artigo 25.1g) deste acordo.

Capítulo segundo: Descansos

Artigo 33: Descanso mínimo

1. - O funcionario terá dereito a gozar dun descanso de vinte minutos durante a súa xornada diaria, que se computará, tódolos efectos, como tempo de traballo efectivo.

2. - O descanso entre xornada e xornada será, como mínimo, de doce horas e o descanso semanal ininterrompido será, como mínimo, de corenta e oito horas, que se gozarán, preferentemente, entre o sábado e o domingo, todo iso a salvo do disposto neste acordo en relación cos traballos extraordinarios.

Capítulo terceiro: Traballos extraordinarios

Artigo 34: Traballos fóra da xornada laboral

1. - Queda prohibida, como norma xeral, a realización de traballos extraordinarios fóra da xornada normal de traballo, salvo aqueles que sexan considerados necesarios e urxentes, cun tope máximo de sesenta horas anuais.

2. - Cando exista necesidade de realizar traballos fóra da xornada laboral repartiranse, de ser posible, de forma equitativa entre os funcionarios membros do colectivo afectado.

3. - Os traballos extraordinarios dos funcionarios serán, previamente, autorizados pola Alcaldía ou, se é o caso, polo concelleiro delegado de Persoal, mediante o correspondente decreto.

4. - Serán unha excepción á regra do apartado anterior os traballos que se consideren necesarios e urxentes para a prevención ou reparación de sinistros, accidentes ou outros danos extraordinarios, que se xustificarán despois da súa realización nun prazo non superior a cinco días hábiles.

Título sétimo: Réxime retributivo

Capítulo primeiro: Retribucións e relación de postos de traballo

Artigo 35: Retribucións. As retribucións recoñecidas na táboa retributiva adxunta teñen o carácter de retribucións brutas consolidadas e, polo tanto, non poderán ser compensables nin absorbibles.

Artigo 36: Relación de postos de traballo. A relación de postos de traballo elaborarase conforme ó disposto na normativa vixente.

Capítulo segundo: Retribucións básicas

Artigo 37: Salario base. En canto ó salario base, ateranse ó disposto na normativa vixente.

Artigo 38: Antigüidade. En materia de trienios ateranse ó disposto na normativa vixente.

Artigo 39: Retribucións de vencemento periódico superior ó mes. En materia de pagas extraordinarias terase en conta a lexislación vixente aplicable.

Capítulo terceiro: Retribucións complementarias

Artigo 40: Complemento de destino. O complemento de destino virá constituído pola cantidade que se retribuirá en función do nivel do posto de traballo que se desempeñe.

Artigo 41: Complemento específico. O complemento específico virá constituído pola cantidade que se retribuirá en función das características especiais do posto de traballo que se desempeñe, segundo o disposto na lexislación aplicable.

Artigo 42: Complemento de produtividade

1. - O complemento de produtividade virá constituído polas cantidades que retribúen o especial rendemento, a actividade extraordinaria e o interese ou iniciativa coa que o funcionario desempeñe o seu posto de traballo, sempre dentro da xornada de traballo.

2. - O Pleno da Corporación, a través da aprobación do orzamento municipal, determinará o importe global da bolsa de produtividade atribuída a cada departamento ou servizo municipal.

Capítulo cuarto: Outras remuneracións

Artigo 43: Gratificacións

1. - As gratificacións serán aquelas cantidades que irán destinadas retribuíla prestación de servizos extraordinarios fóra da xornada normal de traballo.

2. - Queda expresamente prohibido o pagamento de ningunha gratificación que non cumpra os requisitos establecidos no artigo 33 deste acordo, en relación á realización de traballos fóra da xornada ordinaria.

3. - As gratificacións non son fixas, periódicas, nin consolidables de ningunha maneira.

4. - O importe de cada hora extraordinaria será o 110% do valor da hora normal do salario base.

Se o traballo se realizase en día festivo ou en horario nocturno, as cantidades sinaladas no parágrafo anterior incrementaranse nun 25%

5. - O goberno municipal dará conta e informará ós representantes sindicais do persoal funcionario de todo o que concerne ás gratificacións concedidas, en cada reunión ordinaria da Comisión de Control.

Título oitavo: Dereitos sociais

Capítulo primeiro: Prestacións da seguridade social.

Artigo 44: Incapacidade temporal e accidente laboral

1. - O funcionario ten o dereito de recibir unha prestación do Concello de Verín complementaria á que reciba da Seguridade Social por IT e/ou accidente laboral ata completalo total da retribución do funcionario afectado.

2. - Os ditos funcionarios percibirán a totalidade das súas retribucións dende o primeiro día en que se produza o recoñecemento da súa nova situación pola Seguridade Social ata a súa reincorporación ó posto de traballo ou, se é o caso, ata o cumprimento dos 65 anos.

3. - Este dereito decaerá a partir do momento en que se produza, de selo caso, unha xubilación por invalidez, en cuxo caso será de aplicación o disposto no artigo seguinte.

Artigo 45: Xubilación por invalidez

1. - No caso de que un funcionario presente incapacidade sobrevida manifesta para o exercicio das súas funcións, poderá solicitala xubilación por invalidez ou ben poderá o Concello tramitala de oficio, sen prexuízo de situacións de segunda actividade.

2. - No suposto do apartado anterior, o Concello farase cargo da diferenza que exista entre a pensión por invalidez que se recoñeza e as retribucións que o dito funcionario viña percibindo.

3. - A pensión complementaria a cargo do Concello aboarase mensualmente e cubrirá a diferenza entre a pensión mensual que se lle recoñeza e a cantidade mensual que viña percibindo o funcionario por tódolos conceptos, salvo as retribucións complementarias que non sexan fixas e periódicas.

4. - A cantidade que satisfará o Concello será calculada no momento en que, por resolución dos organismos competentes, se recoñeza a xubilación por invalidez, sendo fixa e sen dereito a ningunha revalorización polo transcurso do tempo.

5. - A obriga de pagamento da pensión complementaria que, por este artigo, se recoñece para o Concello aboarase a partir da data da resolución pola que se recoñeza a xubilación e determine a pensión que lle corresponda o organismo competente, e finalizará no momento en que o funcionario cumpra 65 anos.

Artigo 46: Control médico

1. - O Concello de Verín áchase facultado para establecelas probas físicas e exames médicos que se consideren axeitados ós funcionarios que desexen acollerse ós dereitos que se recoñecen neste capítulo, co fin de comprobar a realidade da situación e evitalos fraudes.

2. - Os funcionarios afectados áchanse obrigados pasalas probas que se estimen necesarias, a someterse ós controis e exames médicos.

Artigo 47: Prestacións por familiar incapacitado

1. - O funcionario que teña ó seu cónxuxe ou fillo en situación de incapacidade absoluta para traballar terá o dereito de recibir, mensualmente, a cantidade total de 60,00 euros adicionais por cada membro incapacitado, sempre que algún dos incapacitados non reciba ningunha pensión da Seguridade Social.

2. - O funcionario que teña ó seu cónxuxe ou fillo en situación de incapacidade absoluta para traballar, terá o dereito de recibir, anualmente, a cantidade total de 90,00 euros, por cada membro incapacitado, sempre que reciba unha pensión da Seguridade Social.

Neste último caso, a axuda será satisfeita no momento en que se aboe a paga extraordinaria da mensualidade de decembro de cada ano.

3. - Nos supostos descritos neste artigo, sempre que o cónxuxe incapacitado ou fillo sexan tamén funcionarios deste

Concello será aplicable o disposto nos artigos precedentes en relación á xubilación por invalidez e ás prestacións por IT ou accidente laboral, decaendo este dereito.

4. - Así mesmo, nos supostos descritos neste artigo, sempre que o incapacitado sexa fillo de dous funcionarios deste Concello, estes dereitos sistirán a un só deles.

Capítulo segundo: Responsabilidades civís e xudiciais

Artigo 48: Responsabilidade civil

1. - O Concello obrígase a formalizar un contrato de seguro de responsabilidade civil cuxo obxecto será aseguralas posibles responsabilidades civís de tódolos funcionarios municipais afectados por este acordo polos actos que se realicen por razón do seu traballo, sempre e cando non houbese dolo, neglixencia ou culpa grave, ou mala fe.

2. - O contrato de seguro a que se refire este artigo será concertado cunha compañía de seguros especializada e na determinación da súa contratación e fixación do seu clausulado será oída a Comisión de Control.

Artigo 49: Responsabilidade xudicial

1. - O Concello obrígase a asumilo custo da defensa xudicial dos funcionarios municipais afectados por este acordo que sexan obxecto de actuacións xudiciais, como consecuencia do exercicio das súas funcións, salvo nos casos en que se recoñeza na sentenza dolo, culpa ou neglixencia graves, ou mala fe do funcionario municipal interesado.

2. - A obriga municipal estenderase a tódolos gastos que se deriven das actuacións xudiciais de forma directa, incluíndo as fianzas.

Artigo 50: Responsabilidade de xestión de fondos

1. - O Concello obrígase a garantir, en calquera caso, o quebranto de moeda, sempre que non exista dolo, neglixencia ou culpa graves, ou mala fe do funcionario.

2. - No caso de que as funcións da Tesourería municipal sexan desempeñadas por funcionario da propia Corporación e non por funcionario de administración local con habilitación de carácter nacional, o Concello queda obrigado a correr cos gastos e comisións do aval que, necesariamente, constituirá o funcionario que exerza estas funcións.

Capítulo terceiro: Anticipos de nómina

Artigo 51: Outorgamento e concesión

1. - Todo funcionario municipal afectado por este acordo terá dereito a un anticipo reintegrable, con cargo á súa nómina mensual, ata un máximo de 3.000,00 euros.

2. - O anticipo reintegrable será solicitado polo funcionario interesado, facendo constalos seguintes datos:

1 º )Contía do anticipo solicitado.

2 º )Prazo de devolución desexado.

Artigo 52: Reintegro e devolución

1. - A devolución efectuarase mediante deducións mensuais en nómina, ata completalo total anticipado, sen xerar ningún xuro.

2. - O prazo máximo de devolución será o prazo de doce mensualidades para os anticipos inferiores ou equivalentes 1.200,00 euros e de vinte e catro mensualidades para os anticipos de superior cantidade ata o máximo establecido.

Artigo 53: Requisitos

1. - Como regra xeral, será requisito imprescindible que transcorra un período mínimo de seis meses entre a data de cancelación do anticipo e a data da solicitude dun novo anticipo.

2. - Emporiso, se o funcionario afectado non solicitou inicialmente o anticipo ata o tope máximo establecido, poderá solicitar, en calquera momento, novo anticipo ata completalo máximo reintegrable, de acordo coa cantidade solicitada orixinariamente.

Artigo 54: Cancelación. Como regra xeral, o anticipo reintegrable cancelarase obrigatoriamente, como máximo, no momento en que se establecera na resolución de outorgamento, pero o funcionario beneficiario poderá optar pola cancelación anticipada en calquera momento, mediante o reintegro da totalidade da cantidade pendente de devolución.

Capítulo cuarto: Prestacións familiares

Artigo 55: Axuda por nupcialidade. Establécese unha axuda por nupcialidade, dunha soa vez, por importe de 153,00 euros, a todo funcionario que acredite o matrimonio.

Artigo 56: Axuda por natalidade

1. - Establécese unha axuda por natalidade, por importe de 153,00 euros, a cada funcionario que acredite o nacemento ou adopción legal dun novo fillo ou filla.

2. - No suposto de que ambos pais sexan funcionarios deste Concello, só un deles terá dereito a esta axuda.

Artigo 57: Axuda por defunción

1. - Establécese unha axuda por defunción do funcionario en servizo activo por importe de 612,00 euros.

2. - No caso de falecemento de funcionario municipal en accidente de traballo, os gastos de enterro e sepelio serán de conta do Concello, ata un límite máximo de 1.224,00 euros, trala presentación da correspondente factura ou facturas acreditativas do dito custo.

3. - O pagamento efectuarase ós herdeiros, xa sexan desinados no testamento ou, no seu defecto, na acta notarial ou xudicial, se é o caso, de declaración de herdeiros sen facer testamento, trala xustificación.

Capítulo quinto: Axudas por razón de estudos

Artigo 58: Axuda por estudos

1. - Establécese unha axuda para os funcionarios que cursen estudos regulados en centros de ensino oficial, consistente no 50% do custo da matrícula.

2. - Este dereito non existirá no caso de disciplinas repetidas e será incompatible con calquera outra axuda para a mesma finalidade.

3. - Concederase a axuda a solicitude do funcionario interesado, que irá acompañada da seguinte documentación:

- Copia da matrícula ou documento acreditativo das disciplinas non repetidas e do seu custo.

4. - Este dereito é estritamente persoal e concederase a todos e cada un dos funcionarios municipais que o soliciten e acrediten o cumprimento dos requisitos sinalados, independentemente de que se solicite a axuda por funcionarios que sexan cónxuxes ou de calquera outra consideración.

5. - Este dereito terá periodicidade anual e, pasado o ano no que dea comezo o curso, decaerá, non podendo solicitarse importes adicionais correspondentes axudas non solicitadas de cursos previos en anos anteriores.

Artigo 59: Axuda por escolarización de fillos

1. - Establécese unha axuda para os funcionarios en servizo activo que teñan fillos que cursen estudos regulamentados en centros de ensino oficial e por cada un dos fillos matriculados.

2. - O importe das axudas será o seguinte:

- Preescolar, ensino primario, ensino secundario, formación profesional ou COU: 61,30 euros

- Acceso á universidade para maiores de 25 anos: 153,26 euros.

- Universidade: 245,21 euros

3. - Este dereito non asistirá en caso de disciplinas repetidas

4. - Concederase a axuda a solicitude do funcionario interesado que irá acompañada da seguinte documentación:

- Copia da matrícula ou documentación acreditativa das disciplinas non repetidas e do seu custo.

- Copia do libro de familia ou documento acreditativo da relación familiar.

5. - No suposto de que varios funcionarios deste Concello teñan fillos en común, só poderá asistir este dereito a un deles.

6. - Este dereito terá periodicidade anual e pasado o ano no que dea comezo o curso decaerá, non podendo solicitarse importes adicionais correspondentes axudas non solicitadas en cursos previos de anos anteriores.

Capítulo sexto: Axudas por gastos médicos

Artigo 60: Axudas médicas

1. - Os funcionarios terán dereito a obter axudas deste Concello, coa finalidade de complementalas prestacións sanitarias, no caso de próteses dentarias, de visión, auditivas e ortopédicas.

2. - Os beneficiarios destas axudas serán os propios funcionarios municipais que se achen sometidos este acordo, tanto por gastos por próteses para si como para os familiares que posúan o mesmo número de tarxeta sanitaria ou que, de calquera outra forma, puideran acharse recoñecidos ó seu cargo, para os efectos das prestacións da Seguridade Social.

3. - O importe das axudas será o que, a continuación se determina:

a) Próteses dentarias:

- Prótese completa: 245,20 euros

- Prótese superior ou inferior: 122,60 euros

- Prótese dental de cada peza: 6,80 euros

b) Próteses de visión:

- Lentes normais ou de contacto: 61,30 euros

- Lentes bifocais ou progresivas: 73,56 euros

c) Próteses auditivas: 50% do custo

d) Próteses ortopédicas:

- Sobreplantas: 30,65 euros

- Outros ( colaríns, cadeiras de rodas, muletas, etc. ) : 75% do custo.

4. - Estas axudas serán compatibles con outras axudas que poidan obterse por conta da Seguridade Social ou doutros organismos semellantes, pero sen que, en ningún caso, poidan superalo importe do custo total da prótese.

Artigo 61: Obxecto, requisitos e tramitación de axudas

1. - As axudas médicas concederanse por decreto da Alcaldía, a solicitude do interesado, acompañada da seguinte documentación:

a) Copia da prescrición facultativa médica oficial ou, no caso de próteses de visión, copia da medición de graduación efectuada por óptico.

b) Copia da factura acreditativa do custo total da prótese prescrita.

c) Copia das tarxetas sanitarias do funcionario e do familiar, no caso de que se solicite axuda para prótese dun familiar ou calquera outro documento que recoñeza que ese familiar está ó seu cargo.

2. - No suposto de que existan outras axudas, presentarase o documento acreditativo da axuda concedida e do seu importe, concedéndose a axuda municipal solicitada pero sen que, en ningún caso, poida superalo custo total da prótese.

3. - Establécese a duración mínima de próteses visuais ou lentes en tres anos, non podendo solicitarse nova axuda para a adquisición de próteses de visión para idéntico fin e para a mesma persoa durante o dito prazo, salvo nos supostos seguintes:

a) Cambio de graduación, debidamente xustificado a través de prescrición facultativa médica oficial ou medición efectuada por óptico.

b) .Rotura de lentes en accidente laboral, xustificado a través do informe emitido polo encargado do servizo ou polo xefe do departamento ou da dependencia de traballo.

4. - No caso de que as próteses sexan solicitadas para uso do funcionario, todo funcionario terá dereito á súa solicitude, ó tratarse dun dereito de carácter persoal, independentemente de calquera outra consideración.

No caso de que as próteses sexan solicitadas para uso de familiar que se ache a cargo de dous funcionarios deste Concello que sexan cónxuxes, este dereito só asistirá a un deles.

Capítulo sétimo: Actualización de contías

Artigo 62: Revisión do importe

1. - Anualmente procederase a unha revisión do importe das axudas por dereitos sociais recoñecidos ós funcionarios municipais afectados por este acordo, a través da aplicación dun coeficiente único anual do 2,00%

2. - Só serán revisables en virtude desta previsión, as contías das axudas polos seguintes dereitos sociais que se recoñecen neste título:

* Axudas recoñecidas no capítulo cuarto " prestacións familiares" ,que inclúen:

- Artigo 55 " axudas por nupcialidade"

- Artigo 56 " Axudas por natalidade"

- Artigo 57 " axudas por defunción"

* Axudas recoñecidas no capítulo quinto " axudas por razón de estudos" ,que inclúen:

- Artigo 59 " axudas por escolarización de fillos"

* Axudas recoñecidas no capítulo sexto " axudas por gastos médicos" ,que inclúen:

- Artigo 60 " axudas médicas"

Título noveno: Premios e recompensas

Capítulo primeiro: Premios ó tempo de servizo

Artigo 63: Premios por constancia

1. - Todo funcionario municipal suxeito a este acordo e que cumpra trinta anos de prestación de servizo continuado será premiado polo Concello, no momento do seu cumprimento e por unha soa vez, en concepto de premio á constancia, coa cantidade de 1.500,00 euros.

2. - O premio á constancia regulamentado no presente artigo recoñecerase de oficio, mediante decreto da Alcaldía, baseándose na certificación emitida pola Secretaría municipal.

Artigo 64: Premios por antigüidade

1. - Todo funcionario municipal suxeito a este acordo e que se xubile con máis de vinte e cinco anos de prestación de servizo continuado neste Concello. Será premiado, por este concepto e no momento da súa xubilación, coa contía de 1.500,00 euros, que será acumulable ó permiso ou licenza establecido no artigo 24.1p) deste acordo.

2. - O premio extraordinario á antigüidade regulado no presente artigo recoñecerase de oficio, mediante decreto da Alcaldía, con base na certificación emitida pola Secretaría municipal.

Artigo 65: Recompensa por xubilación anticipada

1. - Todo funcionario municipal suxeito a este acordo terá o dereito de percibir unha prima extraordinaria en concepto de xubilación voluntaria anticipada, de acordo coa seguinte escala:

* Sesenta anos cumpridos: 12.000,00 euros

* Sesenta e un anoscumpridos: 9.600,00 euros

* Sesenta e dous anos cumpridos: 7.200,00 euros

* Sesenta e tres anos cumpridos: 4.800,00 euros

* Sesenta e catro anos cumpridos: 2.400,00 euros

2. - A prima regulada no presente artigo será recoñecida de oficio, mediante decreto da Alcaldía, a proposta da Secretaría municipal, unha vez que conste a documentación relativa ó recoñecemento da xubilación do funcionario interesado no seu expediente persoal.

Título décimo: Seguridade e saúde laboral

Capítulo primeiro: Recoñecemento médico

Artigo 66: Probas e exames médicos anuais

1. - O Concello, con carácter xeral, asumirá a obriga de efectuar un recoñecemento médico a tódolos funcionarios afectados por este convenio, con carácter voluntario, e de comunicalos resultados ó funcionario afectado.

2. - O dito recoñecemento médico será obrigatorio para os funcionarios nos que as funcións signadas ó seu posto de traballo poidan conlevar grave risco para a seguridade e saúde propia ou de terceiras persoas, así como para aqueles postos de traballo que poidan ter especial risco de enfermidade profesional ou un risco específico do tipo que sexa.

Someterase á decisión da Comisión de Control a determinación exacta dos postos de traballo que quedarán obrigados recoñecemento médico anual.

3. - Así mesmo, o Concello asume a obriga e o deber de confidencialidade e de tratamento responsable da información obtida a través de exames e probas médicas, coa máis rigorosa discreción, en virtude do dereito á intimidade persoal e familiar.

Artigo 67: Forma de efectualo exame médico

1. - O recoñecemento médico anual efectuarase dentro da xornada laboral preferentemente, computando a ausencia do traballo como tempo de traballo efectivo a tódolos efectos.

2. - O recoñecemento médico ampliarase a un exame cardiovascular, que poderá ser solicitado por funcionarios municipais suxeitos este acordo e con idade superior a cincuenta anos.

Capítulo segundo: Equipamento de seguridade e saúde

Artigo 68: Vestiario profesional

1. - O Concello proporcionará un uniforme de traballo en concordancia co posto de traballo ou coas funcións que se realicen.

2. - Só terán dereito á uniformidade os postos de traballo que esixan un vestiario especial.

Artigo 69: Medios de protección individual. O Concello de Verín obrígase á posta ó dispor dos funcionarios municipais dos equipos de seguridade e saúde que sexan acordes ás funcións desempeñadas e velar polo uso adecuado dos ditos medios de protección individual.

Artigo 70: Medios de protección colectiva

1. - O Concello comprométese á adopción dos medios de protección colectiva que resulten ser necesarios, a través de medios técnicos, medidas, procedemento ou métodos de organización do traballo, co fin de diminuílos riscos, con carácter prioritario á utilización de medios de protección individual.

2. - Cada centro de traballo contará, imperativamente, cos medios necesarios de primeiros auxilios, en perfectas condicións de funcionamento en todo momento.

Capítulo terceiro: Información e formación

Artigo 71: Deber de información

1. - O empresario ten o deber de informar ós funcionarios sobre:

a) Os riscos para a seguridade e saúde propios de cada posto de traballo.

b) As medidas de protección que se van adoptar

c) As medidas que se adoptarán en materia de primeiros auxilios, loita contra incendios e evacuación do persoal.

d) A información efectuarase a través do Comité de Seguridade e Saúde, salvo cando se refira a un posto de traballo específico, en cuxo caso informarase directamente ó traballador afectado.

Artigo 72: Deber de formación

1. - Os funcionarios municipais poderán acceder á realización de calquera curso relacionado co seu posto de traballo, trala autorización do responsable e en función do orzamento dispoñible, respectándose o principio de igualdade de oportunidades.

2. - A asistencia ós cursos terase en conta para a promoción profesional, sempre e cando se expida certificación que demostre o aproveitamento das materias impartidas.

3. - Anualmente a Comisión de Control elaborará un programa de formación permanente para o persoal funcionario.

Capítulo cuarto: Órganos de prevención

Artigo 73: Comité de Seguridade e Saúde

1. - O Comité de Seguridade e Saúde será o órgano no que se organizará, mediante unha representación paritaria dos representantes do persoal funcionario e laboral, por un lado, e do Concello, por outro lado, para o mellor cumprimento da normativa obrigatoria en materia de seguridade e saúde.

Igualmente, o dito órgano servirá para canalizar tódalas reclamacións ou queixas dos funcionarios municipais en materia de prevención de riscos laborais.

2. - O Comité de Seguridade e Saúde rexerase polas disposicións reguladoras da Comisión de Control, en todo o que resulte aplicable, en especial en materia de organización, composición, réxime de sesións e acordos e funcionamento.

Título undécimo: Liberdade sindical

Capítulo primeiro: Dereitos sindicais

Artigo 74: Exercicio de liberdade sindical

1. - O Concello de Verín e os representantes dos funcionarios comprométense a desenvolver as condicións efectivas que permitan o desenvolvemento do dereito constitucional á liberdade sindical.

2. - Tanto o goberno municipal como a representación do persoal funcionario desenvolverán a súa actividade en materia de persoal de conformidade coas disposicións contidas na Lei orgánica 11/1985, do 2 de agosto, de liberdade sindical, na Lei 9/1987, do 12 de xuño, de órganos de representación, determinación das condicións de traballo e participación do persoal ó servizo das administracións públicas e coas demais disposicións que desenvolvan ou complementen a materia.

Artigo 75: Dereito de folga. Recoñécese o dereito á folga de conformidade coa Constitución española e a normativa que a desenvolve.

Artigo 76: Dereito de reunión

1. - O Concello de Verín poderá autorizar reunións nos centros de traballo fóra da xornada laboral, salvo acordo en contra.

2. - Poderán realizarse reunións ata un máximo de 25 horas anuais, das que dez horas corresponderán ás seccións sindicais e o resto á xunta de persoal ou ós delegados do persoal funcionario.

3. - En calquera caso, a realización de reunións non prexudicará a prestación dos servizos públicos e procurarase que coincida coa entrada ou saída do persoal funcionario.

Capítulo segundo: Estatuto dos representantes dos funcionarios

Artigo 77: Competencias

1. - É competencia dos representantes do persoal funcionario a defensa dos intereses xerais, propios e específicos dos funcionarios e, en particular, a negociación das súas condicións salariais, sociais e sindicais

2. - Os representantes dos funcionarios serán informados obrigatoriamente de:

a) As actuacións que lle afecten ó persoal funcionario e se vaian tratar na Comisión informativa de persoal. Con este fin, enviarase ós representantes dos funcionarios orde do día e acta da reunión anterior, podendo permitirse a súa presenza para que expresen as súas opinións de ser necesario, pero non estarán presentes na deliberación e votación.

b) Aplicación de complementos retributivos, honores, distincións e gratificacións.

3. - Os representantes dos funcionarios serán oÍdos previamente en materia de expedientes disciplinarios, infraccións e sancións ó persoal funcionario.

4. - Os representantes dos funcionarios serán consultados, preceptivamente, en relación cos cambios de horarios e quendas, salvo modificación transitoria, así como en materia de reestruturación e de reorganización do cadro de persoal.

Artigo 78: Dereitos

1. - Os representantes dos funcionarios non poderán ser discriminados no seu dereito á promoción profesional ou económica.

2. - Os representantes dos funcionarios non poderán ser trasladados ou sancionados durante o exercicio das súas funcións, nin dentro do ano seguinte ó seu mandato, por motivos sindicais.

3. - Cada un dos membros dos organismos de representación, así como os delegados sindicais dos funcionarios, disporán de 25 horas mensuais para a realización das súas actividades, coas especificacións seguintes:

a) Quedan fóra do cómputo as horas empregadas na negociación colectiva ou as horas empregadas proposta da administración.

b) A comunicación das horas de uso sindical debe facerse con 24 horas de antelación, ante o Servizo de Réxime Interior e no propio servizo municipal.

No caso de que non se poida facer, respectaranse as necesidades do servizo, pasando posteriormente ó Servizo de Réxime Interior a correspondente notificación

c) Os membros da comisión negociadora comunicarán, coa antelación que lles sexa posible, as ditas ausencias nos seus departamentos.

Artigo 79: Obrigas. Os representantes dos funcionarios obríganse, de forma expresa, a:

a) Cumprir e respectarlo pactado e negociado coa Corporación.

b) Desenvolver labores de estudo e asistencia sindical

c) Notificar á Corporación calquera cambio dos membros designados como representantes dos funcionarios que se puidese producir.

Título duodécimo: Réxime disciplinario

Capítulo único: Infraccións e sancións

Artigo 80: Réxime xurídico. Haberá que aterse, no relativo a infraccións e sancións, disposto na Lei de funcionariado de Galicia e, de forma supletoria, na normativa estatal.

Dilixencia: para deixar constancia de que, en virtude da corrección efectuada no Pleno de data 29.11.2004, na redacción do artigo 26 do presente convenio, onde figura a palabra " incluso" deberá figurar a palabra " excepto" .

Verín, 30 de novembro de 2004. A secretaria.

Paula María Vázquez Carrasco, secretaria do Ilmo. Concello de Verín ( Ourense) , certifico:

Que segundo se desprende do borrador da acta, o Pleno deste Ayuntamiento na sesión que tivo lugar na data que se indica, entre outros, adoptou o seguinte acordo:

9. - Ratificacion do acordo regulador do persoal funcionario do Concello de Verín

Unha vez que a presidencia leu o ditame da comisión, prodúcense as seguintes intervencións:

- Do Sr. interventor para comentar o que xa se dixo na comisión informativa respecto a dous pequenos erros detectados no texto do convenio: o primeiro o do artigo 21 onde se omitiu presenza necesaria dun representante da Xunta nos tribunais de selección e que deberá formar parte deles, en todo caso, e no artigo 26 relativo aos permisos non retribuídos onde terá que entenderse que estes permisos serán en todo caso non retribuídos, co que o texto ¨ incluso os dereitos de percepción do salario ¨ se trata dun erro e debería figurar a palabra excepto en substitución de incluso . - Do Sr. Jiménez Morán ( PP) para decir que xa no 99 levaron a cabo a correspondente negociación cos sindicatos para mellorar a situación dos funcionarios.

Seguidamente a presidencia somete o asunto a votación e por unanimidade de todos os seus membros o Pleno acorda:

Primeiro. - Ratificar o acordo regulador das condicións de traballo do persoal funcionario do Concello de Verín para os anos 2004 - 2007, asinado polas partes.

Segundo. - Trasladalo á autoridade laboral competente para os efectos de rexistro do convenio subscrito.

Para que conste, expido esta certificación coa salvidade e reserva a que se refire o artigo 206 do Regulamento de organización, funcionamento e réxime xurídico das entidades locais, que se aprobou por Real decreto 2568/86 do 28 de novembro, por orde do alcalde e co seu visto e bueno, en Verín na data que arriba se indica.

Verín a 1 de decembro de 2004. Visto e prace O alcalde.